COVID-19 Updates    Mayor's Blog   
  
Indathane yemiklomelo kosomabhizinisi
...

Date: 2024-06-25 11:28:09

Indathane yemiklomelo kosomabhizinisi

Imiklomelo yamabhizinisi asemkhakheni wezokuvakasha, amaDurban Tourism Business Awards, ayaqhubeka nokuba nomthelela omuhle kulo mkhakha. Muva nje, kuklonyeliswe inqwaba yamabhizinisi emcimbini obungomhla ka-13 Juni.

OSOMABHIZINISI abavelele abasemkhakheni wezokuvakasha bakhale bemuka nezinhlobonhlobo zemiklomelo emcimbini wamaDurban Tourism Business Awards obuseNkosi Albert Luthuli International Convention Centre ngomhla ka-13 Juni.
Abaphume phambili baziwinele imiklomelo kakheshi kaR50 000 kwathi abaphume isibili baklonyeliswa ngethuba lokuzithuthukisa elilinganiselwa kuR35 000. 

Abafinyelele endaweni yesithathu bona bazitholele imiklomelo kaR25 000. Imiklomelo yokuthuthukisa abawinile ifaka ama-laptop, amaprinta nama-tablet. Abawine umklomelo i-Exceptional Achievement Award baklonyeliswe ngohambo oluya kwamanye amazwe ngenhloso yokuyofunda olubiza uR100 000. Ngaphezu kwalokho, bonke abawinile bazonikezwa amathuba okukhangisa ngamabhizinisi abo. I-Arthouse Pictures iwine umklomelo i-Upcoming Filmmakers Award ngomsebenzi oncomekayo wokukhangisa ngeTheku njengendawo ephambili yokuqophela amafilimu. IService Excellence Award, ngaphansi komunxa wamahhotela, itholwe yiSuncoast Hotel and Suncoast Towers. 

ISilokazis Events Venue iphume phambili emunxeni iMeetings, Exhibitions, and Special Events Venues kwathi iPhezulu Safari Park yathatha umklomelo ophambili, i-Exceptional Visitor Experience Award. IDurban Walking Tours iwine iTour Guide Award kwathi iGolf Course Boutique Guesthouse yawina ngaphansi komunxa wezindawo ezingewona amahhotela. Abawine umklomelo i-Exceptional Achievement ohlonipha imikhiqizo yezokuvakasha namabhizinisi enza ezibukwayo emikhakheni eyahlukahlukene bami kanje: iLadysmith Black Mambazo yodumo ihlonishwe ngaphansi komunxa wezobuciko, kwathi uMojos Shisayama yawina ngaphansi komunxa wokwamukela izivakashi. 

ICabana Beach Resort ihlonishwe emunxeni wezokutshalwa kwezimali kwathi iCoastal Lounge yaseMgababa yaklonyeliswa ngaphansi komunxa wokutshalwa kwezimali emakhaya nokuthuthukiswa komnotho wasemalokishini, kanti iGrand Bali Resort yona iphume phambili emunxeni wabanikazi bemikhiqizo yezokuvakasha abakhubazekile.