COVID-19 Updates    Mayor's Blog   
  
Amaphoyisa kaMasipala azosebenzisana nawe-SAPS ukulwa nobugebengu
...

Date: 2024-09-27 13:49:11

Amaphoyisa kaMasipala azosebenzisana nawe-SAPS ukulwa nobugebengu

IMeya yeTheku, uKhansela Cyril Xaba, ihlangane noNgqongqoshe wamaPhoyisa, uSenzo Mchunu, ukudingida izinhlelo okungasetshenziswana kuzona ukuze kuqiniswe imizamo yokulwa nobugebengu eThekwini.

UBUHOLI bukaMasipala busamukele ngezimhlophe isinyathelo sikaNgqongqoshe wama-Phoyisa, uSenzo Mchunu, sokuqinisa ubudlelwano neTheku ngenhloso yokuqinisa imizamo yokulwa nobugebengu. Lokhu kuzokwenziwa ngokuhlanganisa imisebenzi yamaphoyisa eSouth African Police Service namaphoyisa kaMasipala. Ngomhla ka-21 Septhemba, uNgqongqoshe uMchunu neMeya yeTheku, uKhansela Cyril Xaba, babe nezingxoxo eDurban City Hall okuhloswe ngazo ukuthi kusayinwe isivumelwano sokusebenzisana nokwenza ukusebenzisana phakathi kwalezi zinhlaka zomthetho kube semthethweni. UNgqongqoshe uMchunu uthe lesi sivumelwano sokusebenzisana siqhamuke ezingxoxweni ezimayelana nokudlanga kobugebengu kuleli, ikakhulukazi eGauteng, KwaZulu-Natali, eWestern Cape nase-Eastern Cape. “Uma singehlisa izibalo zobugebengu kulezi zifundazwe, amazinga obugebengu azokwehla kakhulu kulo lonke leli,” usho kanje. UMeya uXaba uthe ukudlanga kobugebengu eThekwini kuyawuphazamisa nomsebenzi wokuhanjiswa kwezidingo njengoba abasebenzi bezithola beyizisulu zokudunwa kwezimoto nokubanjwa inkunzi uma besemiphakathini belungisa ingqalasizinda eyahlukahlukene. “Sifi sa ukubonga kakhulu kuNgqongqoshe ngalolu hlelo olukhombisa ukuzibophezela kukahulumeni ekusebenzisaneni nazo zonke izinhlaka zomphakathi ukuze kuliwe nesihlava sobugebengu,” kuchaza uMeya uXaba.

Lesi sivumelwano sizosebenza iminyaka emihlanu ngokuhambisana nesikhathi sokuphatha sobuholi obukhona njengamanje. Inhloso enkulu yalesi sivumelwano sokusebenzisana wukuqinisekisa ukuthi izakhamizi zaseThekwini ziphephile, nokwakha indawo evumela ukutshalwa kwezimali ukuze kwakhiwe amathuba omsebenzi ayindlala njengamanje. Ukusebenzisana phakathi kwamaphoyisa kaMasipala naweSouth Africa Police Service kuzoqinisekisa ukusetshenziswa ngokuphelele kwezinsiza. Le mibutho yamaphoyisa emibili izoqhuba imikhankaso yawo ngokuhlanganyela. Lesi sivumelwano sizohlanganisa le misebenzi elandelayo: 

• Ukwakha iDolobha eliphephile lawo wonke umuntu. 
• Ukusungulwa kwezinhlelo nengqalasizinda ezosiza ukwehlisa amazinga obugebengu.
• Ukwenziwa kocwaningo nokuhlanganiswa kwezinsiza okubalwa kuzo ukusetshenziswa kobuchwepheshe. 
• Ukwabelana ngolwazi namakhono ukuze kuqinisekiswe ukusebenza ngendlela esezingeni elamukelekile kwamaphoyisa. 
• Ukuhlinzeka ngezikhungo zikaMasipala, umhlaba, nezakhiwo ukuze zisetshenziswe ngamaphoyisa e-SAPS. 
• Ukusungulwa kwezinhlelo zokubhekana nodlame olweyamene nobulili. 

silindile.cele@durban.gov.za